განათლება
სტრატეგიები ბიზნესში — თიბისის ბიზნესკლუბში დავით მარკოზაშვილის სალექციო კურსი დასრულდა
ბიზნეს ბლოგი
10 ივნისი 2021
visibility 1934

რამდენად მნიშვნელოვანია ბიზნესის წარმოებისას და მისი სამომავლო განვითარებისას სწორი სტრატეგია?

მოდით, როგორც ჩვენი ერთ-ერთი წინა სტატიის შემთხვევაში, საუბარი კვლავაც სტატისტიკით და პროცენტებით დავიწყოთ.

  • ბიზნესლიდერების ნახევარს მიაჩნია, რომ სტრატეგია მნიშვნელობით გეგმის განხორციელებას უტოლდება.
  • ბიზნესკომპანიების წარმომადგენლების 61 პროცენტს მიაჩნია, რომ მათი ბრენდების სტრატეგიასა და ყოველდღიურ საქმიანობას შორის "ნაპრალი" არსებობს.
  • კომპანიების 60 პროცენტი სტრატეგიას ბიუჯეტს არ უკავშირებს.
  • ბრენდების მხოლოდ 10 პროცენტი ახერხებს შემუშავებული სტრატეგიის ორი მესამედის განხორციელებას, უმეტესობას კი გეგმების ნახევარიც ვერ მოჰყავს სისრულეში.

მოკლედ, დავასკვენით, რომ სტრატეგიები ბიზნესში მნიშვნელოვანია, თუმცა, გამოცდილება და ფაქტები იმაზეც მიუთითებს, რომ კომპანიებს არათუ სტრატეგიების განხორციელება, არამედ მათი სწორად დაგეგმვაც კი უჭირთ.

ამბობენ, რომ ბიზნესში "საჭირო ხალხი" შეუფასებელია. ასე იმ ადამიანებს მოიხსენებენ, რომელთაც თეორიულ სწავლებასთან ერთად გამოცდილების გაზიარებაც შეუძლიათ. თამამად შეგვიძლია ვთქვათ, რომ ერთ-ერთი მათგანი დავით მარკოზაშვილია, რომელმაც ცოტა ხნის წინ თიბისის ბიზნესკლუბში ლექციების ციკლი გამართა თემაზე "სტრატეგიები ბიზნესში".

დავითი თავისუფალი უნივერსიტეტის პროფესორი და ანტერპრენერია. მას 15-წლიანი სამუშაო გამოცდილება აქვს საკონსულტაციო, პროექტების მენეჯმენტისა და საჯარო სექტორებში. რას შეეხებოდა ლექციების თემა, როგორ წარიმართა სწავლების პროცესი და რა შედეგების მომტანი აღმოჩნდა ის მსმენელებისთვის — ამის შესახებ თავად დავითი საუბრობს.

"ჩვენს ქვეყანას ყველაზე მეტად სჭირდება განათლება. როცა ვამბობთ, რომ განვითარება აუცილებელია, მასში დიდწილად ეკონომიკურ განვითარებას ვგულისხმობთ. ეკონომიკურ წინსვლას ბიზნესის განვითარება სჭირდება, ბიზნესის განვითარებისათვის კი განათლებაა მნიშვნელოვანი", — აღნიშნავს დავითი.

როგორც ის აცხადებს, ამჟამინდელი სიტუაცია მაინცდამაინც სახარბიელო არ არის, თუმცა, თიბისის მიერ შექმნილი კურსის მიზანი სწორედ ის იყო, რომ მეწარმეებისთვის ეჩვენებინა, "როგორ იღებენ გადაწყვეტილებას ბიზნესში".

"კურსი მიმოიხილავდა, თუ როგორ ხდება კონკურენციის გაწევა სხვადასხვა სიტუაციაში. წარმატებისთვის როგორ უნდა მივიღოთ გადაწყვეტილება და რა ფაქტორები უნდა გავითვალისწინოთ: ბაზრის მდგომარეობა, მისი ანალიზი, კონკურენტის სიძლიერეების შეფასება".

მნიშვნელოვანია, ბიზნესებმა მიიღონ სწორი გადაწყვეტილებები. სწორი გადაწყვეტილებები მათ განვითარებას გულისხმობს, რაც შემდგომ უკვე ქვეყნისთვისაც სარგებლის მომტანია.

დისტანციურ ფორმატში გამართული კურსი შვიდი ლექციისგან შედგებოდა და მოიცავდა არა მხოლოდ ლექტორის სწავლებას, არამედ კითხვა-პასუხის ფორმატს მსმენელებთანაც, რამაც შესაძლებელი გახადა, სწავლების პროცესი ინტერაქციული, აქტიური და სიღრმისეული ყოფილიყო.

"დიდი ხანია, შეხება მაქვს როგორც ბაკალავრიატის საფეხურის, ასევე სამაგისტრო პროგრამის სტუდენტებთან. ამიტომ, ყოველთვის ვცდილობ, მათ ვასწავლო, როგორ იფიქრონ სწორად. სწორედ ამას გულისხმობდა აღნიშნული კურსიც. როცა არ იცი, როგორ გააკეთო ანალიზი და საით მიმართო საკუთარი ხედვა, შეცდომებს ადვილად უშვებ. ჩემი მიზანიც ის იყო, რომ მსმენელებმა ცოდნა გამოიყენონ და მომავალში ჰქონდეთ ფიქრის და ანალიზის გარკვეული საფუძველი, რათა საკუთარი ბიზნესები უკეთ მართონ და წარმართონ."

"რა თქმა უნდა, არცერთი კურსის გავლა არ გულისხმობს, რომ მისით ყველაფერი ამოიწურა. რომელი კურსიც ამას გვეუბნება, ის, ცხადია, გვატყუებს. ამიტომ, მსგავსი სწავლების მიზანი უნდა იყოს, რომ მეწარმეებმა შეიძინონ საფუძველი, როგორ განვითარდნენ, როგორ იყურონ წინ სწორად და მიიღონ სწორი გადაწყვეტილებები".

დავითი ამატებს, რომ, მისი აზრით, კურსის სწავლების მიზნები გამართლდა, რადგან მსმენელებისგან მიღებული კითხვებითა და უკუკავშირით იგი მიხვდა, რომ ისინი "ახლებურად უყურებენ იმ ბაზარსა და სფეროს, სადაც მოღვაწეობენ".

რადგან მსმენელებისგან მიღებულ უკუკავშირზეა საუბარი, კარგი იქნებოდა, აქტიური მონაწილეებიც გაგვეცნო: რა მოლოდინები ჰქონდათ კურსის მიმართ და რა შესძინა მათ შვიდნაწილიანმა სწავლებამ.


დალი ვასაძე — ფსიქოლოგიური ცენტრი ჩემი სამყაროს დამფუძნებელი

"ჩემი მოლოდინები, რეალურად, გამართლდა. ბიზნესსაქმიანობა ახალი დაწყებული მაქვს და მაინტერესებდა, რაზე უნდა გამეკეთებინა აქცენტი, როცა სტრატეგიას დავგეგმავდი. მე მქონდა საკუთარი მოსაზრებები, თუმცა, კურსი დამეხმარა, მნიშვნელოვანი საკითხები გამომეკვეთა და, ამასთან, ჩემი აზრებიც გამემყარებინა. ასევე, კურსმა საკუთარ თავთან არგუმენტირების უნარიც შემძინა — მაგალითად, ასე რომ ვაკეთებ, რატომ არის სწორი. ნამდვილად მივიღებ თუ არა სასურველ შედეგს. სწავლებისას ყველა ის მნიშვნელოვანი თემა იყო განხილული, რომელიც აუცილებლად დაგჭირდება, თუკი დამწყები ხარ. როცა ბაზარზე შედიხარ, საჭიროა რისკების შეფასება. მე კონსულტაციას არავისთან გავდივარ, დამოუკიდებლად ვცდილობ ყველაფრის შესრულებას. ამიტომ, აღნიშნული კურსის აგებულებამ იმის გაანალიზებაც მასწავლა, თუ რატომ არ გამომივიდა რაღაცები — თუკი არასასურველ სიტუაციაში აღმოვჩნდი, რატომ აღმოვჩნდი. ამავდროულად, შემიძლია, შესაბამისი ინფორმაციის მოძიებაც".


თაზო მეფარიშვილი — შპს გულიანი გრუპის ქსელის სენიორ მენეჯერი

"მე პატარა ბიზნესი მაქვს და ამ მიზეზით კურსი ჩემთვის განსაკუთრებით საინტერესო იყო. იდეალური პროექტი იყო ნამდვილად: ლექტორიც, მოწოდებული მასალაც და მისი გადმოცემაც, ასევე ბევრი პრაქტიკული სავარჯიშო. 10-ქულიანი სისტემიდან ალბათ 10-ით შევაფასებდი".


თამთა კაკაურიძე — Academy 26-ის CEO

"პირველად დავესწარი ბიზნესის სტრატეგიების ლექციას. მთავარი მოტივაცია ალბათ ის იყო, რომ იმ საკითხს ეხებოდა, რისი განხორციელებაც სამომავლოდ მსურს: როგორ დავგეგმო ბიზნესი, კონკურენტების შეფასება და სხვა. ეს შვიდნაწილიანი კურსი კი მეტად საინტერესო გამოდგა. შეგვიქმნა წარმოდგენა, თუ რა ხდება ბაზარზე — როგორ მიმდინარეობს ლურჯი და წითელი ოკეანეების თამაში და რას გულისხმობს თამაშის თეორია. ვფიქრობ, კურსმა ყველა მონაწილეს სხვაგვარად დაგვანახა, თუ როგორ ფუნქციონირებს ბაზარი. გარედან, შესაძლოა, ასე არ ჩანდეს, ჩანდეს, თუმცა, შიდა პროცესები მაინც განსხვავებულია".


თიბისის ბიზნესკლუბი კი საქმიანობას განაგრძობს. კლუბის წევრებს თიბისი სხვადასხვაგვარ შესაძლებლობას სთავაზობს: ინდივიდუალურ კონსულტაციებს, კითხვებზე პროფესიონალებისგან პასუხის მიღების საშუალებას, სასწავლო კურსებს და სხვა. ამასთან, პარტნიორი კომპანიებისგან მათ სპეციალურ შეთავაზებებსაც აწოდებს.

ბიზნესკლუბისა და მასში გაწევრების შესახებ დეტალურ ინფორმაციას ვებგვერდიდან შეიტყობთ.