თანამედროვე ბიზნესის საქმიანობა ელექტრონული კომერციის გარეშე წარმოუდგენელია. ამაზე სტატისტიკაც მოწმობს - ინტერნეტში 24 მილიონზე მეტი ელექტრონული კომერციის ვებგვერდი ფუნქციონირებს, ხოლო ინდუსტრიის ბრუნვა 5 ტრილიონ აშშ დოლარს მიუახლოვდა. გლობალურმა პანდემიამ კი ბიზნესის გაციფრულების პროცესი დააჩქარა, რადგან საყოველთაო შეზღუდვები გამო ონლაინ ვაჭრობა ბიზნესისთვის სასიცოცხლოდ მნიშვნელოვანი აღმოჩნდა. მცირე და საშუალო ბიზნესში გაჩნდა მოთხოვნა შესაბამისი კომპეტენციის ადამიანებზე. სწორედ ელექტრონული კომერციის ეკოსისტემის განვითარებისა და მცირე და საშუალო ბიზნესისთვის კვალიფიციური კადრების მომზადების მიზნით, იქომერს ასოციაცია - საქართველომ, თიბისიმ და USAID-ის ეკონომიკური უსაფრთხოების პროგრამამ ელექტრონული კომერციის აკადემია დააფუძნეს. სულ ახლახანს კი აკადემიამ პირველი კურსდამთავრებულები გამოუშვა.
ელექტრონული კომერციის აკადემიის პირველი კურსზე სწავლა 5 აპრილიდან 16 ივლისამდე გრძელდებოდა. კურსზე სულ 20 სტუდენტი ჩაირიცხა. სასწავლო კურსი მოიცავდა ექვს თეორიულ და სამ ინტეგრირებულ პრაქტიკულ მოდულს. კურსის ფარგლებში, სტუდენტებმა ცოდნა მიიღეს ინდუსტრიის მოწინავე პროფესიონალებისაგან, გაეცნენ მაგალითებს რეალურ ბიზნეს ქეისებზე დაყრდნობით და დასახეს გზები საკუთარი ელექტრონული კომერციის პროექტების გასაუმჯობესებლად.
ლექციები ფიზიკურ სივრცეში, თიბისის ტრეინინგ ცენტრში მიმდინარეობდა, სადაც ლექტორებთან უშუალო კომუნიკაციისას სტუდენტებს შეეძლოთ თავიანთ არსებულ ელექტრონულ კომერციის პროდუქტებზე რეკომენდაციები მიეღოთ.
ანა ნადირაძე
ანა ნადირაძე ერთ-ერთი კურსდამთავრებულია, ის ამბობს, რომ ელექტრონული კომერციის აკადემიის კურსმა მის მოლოდინს გადააჭარბა, რადგან „არ ყოფილა არცერთი მოდული, ლექცია, რომელიც ფუჭად დახარჯულად ჩაითვლებოდა, არამედ, პირიქით, თითოეული მოდული იყო სიახლეებითა და პრაქტიკული რეკომენდაციებით დატვირთული. ლექტორები იყვნენ მომზადებულები და საჭიროების შემთხვევაში მზად იყვნენ პირადი კონსულტაციებისთვისაც. სტუდენტების მაქსიმალური ჩართულობა კი ლექციას მეტად ინტერაქციულსა და ღირებულს ქმნიდა.
"კურსის ფარგლებში მიმოვიხილეთ ყველა პროცესი, რაც ბიზნესის გაციფრულებას ახლავს თან. საშუალება მომეცა აუდიტორიისთვის გამეცნო ჩვენი სტარტაპი horsetours.ge, რომელიც წარმოადგენს საცხენოსნო ტურების პლატფორმას და მიმეღო რეალური უკუკავშირი მათგან, რაც ჩვენთვის, როგორც დამწყები ბიზნესისთვის, უმნიშვნელოვანესია. ჩვენ უკვე დავიწყეთ მიღებული რეკომენდაციების გათვალისწინება, კერძოდ კი, განვახორციელეთ SEO ოპტიმიზაცია, User Person-ის სიღრმისეული კვლევებითა და სხვადასხვა პლატფორმების გამოყენებით დავავიწროვეთ აუდიტორია და გავხადეთ ჩვენი კომუნიკაცია მომხმარებლებთან კიდევ უფრო პროდუქტიული და ზუსტი,“ - თავის გამოცდილებას გვიზიარებს ანა.
კურსის ხელმძღვანელი მარიამ ხიზანაშვილი გვიყვება, რომ სტუდენტებმა ელ.კომერციის მართვის სრული ციკლი შეისწავლეს, რაც აერთიანებდა როგორც ბიზნესის სტრატეგიულ ნაწილს, ისე ელ.კომერციისტექნოლოგიურ, ოპერაციულ და ანალიტიკურ მხარეს.
მარიამის თქმით, კურსი მოიცავდა ელექტრონული კომერციის სრულ, 360 გრადუსიან ციკლს. მოდულარული სწავლების გზით, კურსდამთავრებულები შეძლებენ მიღებული ცოდნა გამოიყენონ თავიანთი ბიზნესის გასაზრდელად ან დასაქმდნენ მენეჯერულ პოზიციებზე ციფრული პროდუქტების განვითარების კუთხით.
„ჩვენ მიგვაჩნია, რომ ელექტრონული კომერციის სწორი დაგეგმვისა და მართვის გამოცდილებით, კომპანიები, მეწარმეები თუ დასაქმების მსურველი პირები შეძლებენ, რომ შექმნან მაღალი ხარისხის ონლაინ ვაჭრობის გამოცდილება, მოიპოვონ მომხმარებლის ნდობა და გაზარდონ ბიზნესი. ელექტრონული კომერცია ინტერსექციული და მრავალპროფილური დარგია, ჩვენი აკადემიის კურსდამთავრებულებმა იციან არა მარტო ელექტრონული კომერციის რომელიმე კონკრეტული ასპექტი, არამედ სრულ ციკლზე აქვთ ცოდნა და კომპეტენცია, რათა შეძლონ მისი წარმატებით დაგეგმვა, დანერგვა და მართვა. ამ გზით, ჩვენ ხელს ვუწყობთ ელექტრონული კომერციის დარგის პროფესიონალიზაციას და ზრდას ჩვენს ქვეყანაში,” - ამბობს მარიამ ხიზანაშვილი.
ლიკა მიქავა, რომელიც ასევე აკადემიის კუსდამთავრებულია, ფიქრობს, რომ მიღებული ცოდნა მას დაეხმარება სამომავლო გეგმების შესრულებაში.
ლიკა მიქავა
„აქ სწავლის განმავლობაში დავაგროვე დიდი ცოდნა, გამოცდილება და გავიცანი არაჩვეულებრივი ადამიანები. მიუხედავად იმისა, რომ ელექტრონული კომერციის მიმართულებით მქონდა პრაქტიკული გამოცდილება, აღნიშნულმა კურსმა მომცა საშუალება სიღრმისეული თეორიული ცოდნითაც გამემყარებინა ჩემი უნარ-ჩვევები ამ სფეროში. გარდა ამისა, ვფიქრობ რომ დამეხმარება ჩემი სამომავლო გეგმების შესრულებაშიც, რადგან ვგეგმავ ელექტრონული კომერციის მიმართულებით გავაგრძელო ჩემი საქმიანობა და უახლოეს მომავალში ვაპირებ გავუშვა საკუთარი ონლაინ მაღაზია. ამასთანავე, ვგეგავ ზოგადი პრაქტიკული კურსი შევთავაზო „ელექტრონული ვაჭრობის" კუთხით, იმ კომპანიებს, რომლებთანაც ვთანამშრომლობ,” - ამბობს ლიკა.
კიდევ ერთი კუსდამთავრებული მარიამ მაისურაძე გვიყვება, რომ კურსი მას დაეხმარა შეეფასებინა სამუშაო პროცესები და მინიმალური დანახარჯებით გაეუმჯობესებინა თითოეული დეტალი.
მარიამ მაისურაძე
„ჩემთვის როგორც მეწარმისთვის მნიშვნელოვანია შემეძლოს ბიზნესისთვის საჭირო საკითხების ცოდნა ელექტრონული კომერციის მიმართულებით. კარგია როცა გაქვს იდეა ან მოქმედი ბიზნესი, თუმცა რთულია მისი განხორციელება და იმპლემენტაცია. უკვე შემიძლია დამოუკიდებლად ვმართო ჩვენი საიტი, მივიღო რაციონალური გადაწყვეტილებები, დავნერგო უკვე აპრობირებული მეთოდები და გავხადო ჩვენი პროდუქტი მაქსიმალურად მომხმარებელზე მორგებული, რაც პირდაპირ პროპორციულია ჩვენი გაყიდვების,“ - ამბობს იგი.
მარიტა გოგიტიძე კი ამბობს, რომ კურსი ინტენსიური და ბევრის მომცემი იყო და აკადემიაში სწავლა მისი ერთ-ერთი საუკეთესო გამოცდილებაა.
მარიტა გოგიტიძე
„პროფესიონალი ლექტორებისგან შემდგარი გუნდისგან მივიღე ამომწურავი ინფორმაცია ელექტრონული კომერციის სრული ციკლის შესახებ - სტრატეგიის შემუშავებიდან საბოლოო მომხმარებლამდე. აღსანიშნავია, რომ თითოეული ლექტორისგან მივიღე არა მხოლოდ თეორიული, არამედ პრაქტიკული ცოდნაც. ისინი ყოველთვის მზად იყვნენ დამატებით ინდივიდუალური კონსულტაციისთვის. იმის გათვალისწინებით, რომ სტუდენტები სხვადასხვა მიმართულებით ვიყავით დასაქმებულები, შეგვძეძლო ლექციებზე გამოცდილებების გაზიარება და თეორიული საკითხების პრაქტიკაზე მორგება, რაც კიდევ უფრო საინტერესოს ხდიდა პროცესს. ვფიქრობ, რომ აღნიშნული კურსით კიდევ უფრო გაფართოვდა ჩემი შესაძლებლობები და უკვე მეტი კომპეტენციით შემიძლია ელექტრონული კომერციის მიმართულებით პოზიციონირება,” - ამბობს მარიტა.
ელექტრონული აკადემიის გუნდს მუდმივი უკუკავშირი ჰქონდა სტუდენტებთან, როგორც მოდულის სტრუქტურის, შინაარსის, მეთოდოლოგიისა და ლექტორებისა, ისე ორგანიზაციული დეტალების შესახებ. კურსის ხელმძღვანელი მარიამ ხიზანაშვილი ამბობს, რომ ეს საუკეთესო გზაა, კურსის გასაუმჯობესებლად.
„ეს იყო პირველი სასწავლო კურსი ელექტრონული კომერციის აკადემიისათვის და საერთოდ ელექტრონული კომერციის ჰოლისტიკური მართვის კუთხითაც, ამიტომ კურსის ფარგლებშიც ვმუშაობდით და ახლაც აქტიურად ვმუშაობთ სილაბუსის დახვეწა-ოპტიმიზაციაზე. თვითონ ელექტრონული კომერციის დარგიც ძალიან სწრაფად ცვალებადი და ადაპტირებადია, ამიტომ სილაბუსის შინაარსობრივი ნაწილი მუდმივ განახლებას მოითხოვს. ამისათვის მზად ვართ და ვაპირებთ კურსიდან კურსამდე სილაბუსში ავსახოთ ელექტრონული კომერციის დარგში რეალურად მიმდინარე ცვლილებები.
ელექტრონული კომერციის აკადემია ჩამოყალიბდა მათთვის, ვისაც საკუთარი ბიზნესისათვის ონლაინ ვაჭრობის განვითარება სურს, ამასთან ელექტრონული კომერციის სექტორში მომუშავე დამწყები ან საშუალო დონის პროფესიონალებისთვის და ელექტრონული კომერციის სექტორში დასაქმების მსურველებისთვის, რომელთა მიზანი კვალიფიკაციის ამაღლება და ციფრული პროდუქტების განვითარების კუთხით მენეჯერული პოზიციების დაკავებაა.
აკადემიის პარტნიორია თიბისი, რომლისთვისაც მცირე და საშუალო ბიზნესების მხარდაჭერა და ელექტრონული კომერციის განვითარება განსაკუთრებით პრიორიტეტულია. თიბისიმ გასული წლების განმავლობაში არაერთი პროექტი წამოიწყო ბიზნეს პროცესების გაციფრულების და ელექტრონული ვაჭრობის ხელშეწყობის მიზნით.
ელექტრონული კომერციის აკადემიის კიდევ ერთი მხარდამჭერია USAID-ის ეკონომიკური უსაფრთხოების პროგრამა, რომელთან ერთადაც აკადემია, საერთაშორისო პარტნიორების - eTrade Alliance-ისა და ლათინური ამერიკის ელ.კომერციის ასოციაციების ქსელის eCommerce Institute-ის დახმარებით, სექტემბრიდან გადაამზადებს ელექტრონული კომერციის ტრენერებს სწავლა-სწავლების ინტერაქტიულ მეთოდოლოგიაში, ხოლო უშუალოდ აკადემიის თანამშრომლებს კურსის ორგანიზებისა და სწავლების პროცესის გაუმჯობესებაში დაეხმარება.
ასევე, ელექტრონული კომერციის აკადემიის მხარდამჭერია Mastercard, რომლის ფინანსური დახმარებითაც რამოდენიმე სტუდენტმა კურსზე სრული დაფინანსებით შეძლო სწავლა.
ელექტრონული კომერციის აკადემიაში შემდეგი მიღება სექტემბრიდან გამოცხადდება, ხოლო სწავლა 2022 წლის ოქტომბრიდან დაიწყება.